صحبة امنة..............جدا

لما قررنا نسافر وخلصنا ورقنا في الخباثة عملنا قرود علشان اهلينا توافق تسبنا. كان عندنا كذا مشكلة بسيطة كده في اقناعهم

اولا: مشكلة الامان

ودي اتغلبنا عليها لما اقنعناهم ان الملحق الثقافي لمصر بالسفارة الاسبانية( اي والله زي مبقول كده الملحق الثقافي) هينتظرنا في مطار مدريد بنفسة مرحبا بنا ومستقبلا لفتايات مصر المكافحات . وان الراجل حالف يمين طلاق علي مراته ان رجلة علي رجلنا لحد نزل الطلاب المغتربيين( واخد بالك من نزل دي) وده ترحيبا بطالبات العلم وتشجيعا لنا كخمسة فتايات محاربات وردا علي الفصائل الاسرائيلية ومن اجل لبنان واحد

ام الملحق الثقافي بقة عمل ايه؟؟؟ ساب السفارة والسفير والشغل والمؤتمرات علشانا طبعا

والحدق يفهم طبعا انه لا كان في ملحق ثقافي ولا ملحق السيارات. بس كنا مستعدين نوصلها للملحق العسكري لو مسبوناش نسافر . و بعد منزلنا مطار مدريد قعدنا ست سعات نعيط في المطار ونلطم لاننا اكتشفنا اننا فعلن معنرفش حد هنا ولا معانا عنوان نروحة ولا مكان نبات فيه ولا نيلة

وكان معانا يجي 13 شنطة. والله مببالغ. كنا لامين كل خلاجتنا تقريبا. وشاي وسكر وعلب تونة. تقولش كان قلبنا حاسس اننا هنتمرمط؟

وكان الاختلاف بنا هل نبات في المطار ام في احدي الحدائق العامة ام نرجع طوالي عالكفر تاني ونبوس ايد اهالينا ونتجوز ونقعد في البيت

المشكلة التانية

كانت مشكلة دينية خاصة بتلاتة مننا_ اللكشة المسلمة_ لان اهالينا بعد تفكير عويص ومتأني طلعوا بعقبة تانية الا وهي: ازاي نسافر خمس بنات من غير محرم

امنا احنا بقة ايه ؟ قلنا عيب لازم نشوفلها مخرج دي . وبعد مستشرنا ولاد الحلال قالونا كده امركوا لله باظت الخطة لان المحرم ده حاجة مهمة قوي قوي. واشارت علينا بعض صديقتنا ذوات العقل الراجح والمعروفات بالحكمة والخبرة ان الحل بسيط ....اتجوزوا

لكن الفرج جه من عند ربنا

كانت اكتر واحدة فينا عندها معلومات دينية اسلامية فقهية هي الاخت الفاضلة رقم 4 والجدير بالذكر انها مسيحية

قالت اية بقة نمرة اربعة؟ قالت يابنات تاهت ولقناها

الصحبة الامنة

ايه الصبحة الامنة دي؟ قالت ان في الحج ممكن مجموعة ستتات تسافر من غير راجل لانهم صحبة امنة

تاهت ولقناها والله

يعني اهاليكوا هيكونوا اغتت من موظفين الجوازات في السعودية

اتكلوا علي الله

علي مسئوليتي

ومكدبناش خبر؟ خدنا الفتوه من بق البنية علي اهالينا عدل. وقلنالهم اننا لايمكن نغضب ربنا ونسافر من غير محرم لكن الشرع اجاز لينا اننا نسافر مع بعض بشرط اننا نخالي بالنا من بعض ومنسبش بعض ابدا. انتوا هتعترضوا علي شرع الله؟؟؟؟؟؟؟؟؟؟؟؟؟

وفلسعنا قبل ميلحقوا يتأكدوا من الفتوه

وهناك اثبتنا اننا خير صحبة امنه

فتاة رقم 1: انتي نازلة رايحه فين متأخر كدة

فتاة رقم 2- هجيب حاجة من البقال

فتاة رقم 1- طيب ياحببتي متنسيش تخدي المطوة معاكي

الله !! مش لازم نخلص زمتنا من ربنا ونبقي صحبة امنة؟؟؟؟

العبرة من هذا البوست

1- إن كيدهن عظيم

2- متصدقش بنتك لو عملتلك قردة علشان تسافر تتسنكح مع صحبنها قال ايه منحة دراسية

3- لا وجود لما يدعي الملحق الثقافي وده بيان علي مسئولية السفارة

4- متنساش علب التونة وانت مسافر لانك في الغالب هتشوف ايام سوده

ويجعلة عامر