عندي أكتئاب
النهاردة التصويت علي تعديل الدستور
الشركة قررت تمشي كل الموظفين بدري من باب الوطنية يعني
وانا عارفة مقدما هيروحو فين
الستات هتروح تعملها حلة محشي
البنات اتفقوا قدامي يتقابلوا في كافية
الرجالة هتروح تمدد في السرير ساعتين
اللي رايح يصوت حاجة من اتنين: يأما بيعمل اللي علية علشان ميبقاش سلبي وهو عارف مقدما أن اي حمار بينهق قدام باب اللجنة صوته اهم منه
يأمة زي أخويا متفائل وعبيط
انا مش حاسة غير بالقرف
احنا بنضحك علي مين؟
نعرف ايه احنا عن الدستور؟
بنثق في مين؟
نجلاء اللي بتيجي تساعد ماما في البيت بقولها دستور قالتلي ((هيهيء داستور يااسيادنا)) والله جدعه يابت يانوجا
4 comments:
اه نجلاء عندها حق فعلا:ي على العموم مبروك البلوج بتاعك واضح انك لسه مدونة جديدة زى حالاتى وان شاء الله نقرالك موضوعات جامدة
أنا أصلا إتجننت.
قاعد مع واحد صاحبى من شويه، لقيته بيقوللى هما الناس بتتظاهر ليه؟ قلتله علشان التعديلات الدستوريه مش حلوه.
تعرفى قالى إيه؟ قالى، ما هما عبط قوى و عندهم قصر نظر، مش كانوا بيطالبوا بتعديل الدستور، اهو الريس عدله، كمان مش عاجبهم.
بس، لا تعليق.
على فكره، أنا قريت البوستات القديمه بتاعتك.
أسلوبك حلو، شخصى، بس بياخد الواحد معاه جوا شخصيتك.
برافو عليكى، كملى الشغل الهايل ده
بالظبط
سلميلي علي نوجا بقي :)
Post a Comment