دايما بحس بوجود رابط بيجمع الرجال مهما اختلفت اعمارهم او اديانهم او ظروفهم، حتي لو كانوا ميعرفوش بعض
زي ميكونوا اعضاء نادي واحد حصري جدا . نادي للرجال فقط
ولما بقول كده بيتهموني بالوسوسة
سيبكوا يابنات من النرفزة والعصبية اللي فيهم وانهم بيمشوا يقولوا شكل للبيع مع بعض
وان لو عربيتين اتزنقوا في شارع سد اللي بيتحرك ويوسع للتاني الاول بيعتبروا عندو هرمونات انوثة اعلي
وبردوا نغض الطرف عن روح التنافس اللي ركباهم واللي بسببها بتطلع روح أغلبهم للرفيق الاعلي
كل دي حركات
اسألوني انا
الرجال هم اخلص الاصدقاء فيم بينهم حتي لو اول مارة يقابلوا بعض، والسبب انهم أعضاء نادي او مركز شباب الخلابيص
ده قانون لا يمكن يكسروه
Code
هديكوا مثال
لو انتي متجوزة وعايزة تتأكدي من ده بنفسك، سيبي جوزك قاعد في الصالة بيتفرج علي الماتش وبياكل بطيخ وخشي جوه اتصلي بكل اصحاب جوزك واعداءه وقرايبه حتي كمان اتصلي بكل راجل متخانق جوزك معاه
اتصلي بكل رقم رجالي في اجندة جوزك او علي الفون بوك ( لو جوزك خريج مدارس لغات
وقوليلهم انك بتتصلي علشان تتأكدي من كلامة وانه قلك ان بات عند صحبه ده امبارح ( وطبعا ده محصلش وكان نايم بيشخر طول الليل بشهادة الجيران
دي إحصائية علميه عايزين نسجلها في المجلس الأعلي لشئون المرأة
لو كلمتي 40 راجل
تمانية وتلاتين راجل منهم هيقولولك امال ايه؟ دي حتي كانت سهرة ظريفة موت وعايزين نبقه نكررها وانو حلف عليه لهو جايب المدام والاولاد المرة الجاية
طب الاتنين الفاضلين؟ ايه؟ عندهم أخلاق وضمير وهيقولوا الحقيقة؟
مش بقولك هابلة
الاتنين اللي فاضلين هيحلفوا بالطلاق انه لسة عندهم لحد دلوقتي
Its a guy thing, they stick together no matter what.....
